Mipadayag sa ija kabayaka an inahan nan isa ka 11 anyos na bata ug estudyante sa Mariano Espina Memorial Central Elem. School (MEMCES) na si Rosalinda Lopez human na tagbati an pagsakit sa tiyan, lakip uyo ug nagluja pa an ija anak human na tagpatumar nan tambay sa porga.
Tagtudlo niini, lujo sa mga isyu ug panghitabo didto sa kaulohan kabahin sa bakuna sa dengvaxia na taghatag ngadto sa mga kabataan na kon diin pipila na an namatay, sija isab an nabiro adton milabay na semana human na nouli an ija anak na may tagbati na sa lawas human napainom nan tambay sa porga. Gani ija dajon tagpakisayran kon kagan-o nagsugod ug didto na notug-an an bata na human sila napatumar nan tambay batok bitok.
Mipadayag isab nan inisyal na pagtubag niini an mga magtutudlo nan MEMCES pinaagi sa teacher-adviser na si Zenaida Jardenil ug Fe Bolimbao an subject teacher, sumaya pa ikaduha na ini na paghatag nila sa tambay sa porga. Gani adisir nahatag an una na dosage, tagpapirma nila sa Parent’s Consent an mga ginikanan. Dugang pa, sa dihang tagpatumar nan tambay, ilayom ini sa superbisyon sa nurse nan Dept. of Education.
Sa habig isab nan School Supervisor sa MEMCES na si Marian Pepito, ila tagpasubay an kaso nan anak ni Lopez ug didto nahibaw-an na posible nosakit an tiyan resulta sa wayay kaon ini sa dihang notumar. Tagtudlo na una na tagpadayag nila sa mga estudyante na adisir hatagan sa tambay sa porga, mokaon anay nan pamahaw. Tinuod isab na ikaduha na dosage an ila taghatag na tambay sa porga ugsa waya nay Parent Consent kay tagpadajon ra an paghatag sa tambay, an una na paghatag sa dosage didto may tagpapirma nila sa mga ginikanan.
Tagtindugan isab niini, gawas kan Lopez waya nay lain na mga estudyante o ginikanan an nagreklamo na may laing tagbati human napatumar sa tambay sa porga.
