Davao City – Nagbangotan karon ang usa ka pamilya human wala na matabang ug gideklarang patay sa Central 911 Medic Team ang onse anyos nga batang lalake.
Segun sa amahan nga si Marcelo Abenon, ug residente sa Mandug ning siyudad nga tulo na ka oras nalumos ang iyang anak nga si Anthony, 11 anyos ug usa ka estudyante.
Bandang alas-3:00 na sa hapon na-rescue ang bata nga si Anthony, gikan sa pagkalumos sa lapukon nga linaw sa Indangan maong wala na matabang pa sa Medic Team.
Subay sa imbestigasyon sa Buhangin PNP, pasado alas-12:00 sa udto mikuyog matud pa ang biktima sa iyang mga higala aron mangaligo sa gamay nga linaw nga dunay gilawmong 7 feet.
Nasayran gikan sa amahan nga dili makabalo mulangoy ang biktima resulta sa pagkalumos.
Sa pagkakaron gidala na sa punerarya ang biktima alang sa paghaya sa patay’ng lawas niini.
RadyoMaN Joel Viray
