Davao City- Arestado ang 11 katao atol sa gipahigayong Oplan Bulabog kaniadtong adlawng Biyernes nga gihimo sa pipila ka mga Brgy. dinhi sa syudad sa Davao.
Sa report sa Davao City Police Office kun DCPO, naaresto sila Juhanny Almodovar Proposi sa falsification of government documents, James Baguio Madelo nga dunay kasong murder, Renato Gadiano violation sa SSS, Araceli Gunayan sa trust receipt law, Janice San Juan ug Marjan Intos Jimlani sa kasong pagpangawat, Roel Ricardo Baliad, Eddie Laurente Basti, Bernard Guinez Bustillo, Remedio Butas, ug Felomina Sim Dalisay sa kasong illegal gambling.
Ang maong operasyon miresulta sa pagsuta sa dul-an 2,000 ka mga indibidwal, lakip na ang 317 transient nga mga residente nga walay napakitang ID ug walo ka Internally Displaced Persons (IDPs).
Dugang niini, na-impound sab ang 15 ka motorsiklo gumikan sa bayolasyon sa balaod trapiko.
Dungan nga gipahigayon sa kapulisan ang Oplan Bulabog sa Barangay Duterte, Purok 6 sa Barangay 37-D, Bangkal, Parcia sa Km. 10, Purok Lote-lote sa Barangay Tigato, Purok 13 ug 14 sa Tibungco, Sto.Nino sa Pogilawis, Mintal Public Market sa Mintal ug Teachers Village sa Calinan ning dakbayan.
Kauban sa DCPO ang Task Force Davao, Regional Public Safety Battalion (RPSB), Philippine Coast Guard (PCG), Regional Mobile unit ( RMU), National Intelligence Coordinating Agency (NICA) XI, National Bureau of Investigation (NBI) XI, Criminal Investigation and Detection Group (CIDG) XI, Regional Intelligence Unit (RIU), Aviation Security Unit (AVSEU) XI, and Bureau of Immigration and Deportation (BID) sa pagpahigayon sa maong operasyon.
RadyoMaN Renz Barbarona
