11 ka contingents gikan sa barangay ug high school sa Cagayan de Oro ang magtige sa Higalaay Carnival Street Dance Competition ugmang adlawa, Dominggo.
Ang street dance competition magsugod sa alas-3:00 sa hapon sa Velez Street sa Divisoria padulong sa Rodelsa Circle, Barangay Nazareth diin ipahigayon ang final showdown.
Ang champion makadawat og P125,000, P75,000 sa first placer ug P50,000 sa second placer. Ang pares sa Carnival King ug Carnival Queen makaangkon og P12,000, P6,000 sa first placer ug P4,000 sa second placer.
Lakip sa mga contingents ang Barangay Puerto, Macabalan, Barangay 16, Liceo de Cagayan University, City National High School, Patag National High School, Carmen National High School, Macabalan National High School, Mambuaya National High School, Bugo National High School ug East Gusa National High School.
