Dumarao, Capiz – Onse ka mga indibidwal nga ginapahayag nga sympatizer sang rebelde nga New People Army ang pormal nga gin-utod ang ila koneksyon sa nasambitan nga terorista nga grupo kadungan sang ginpatigayon nga aktibidad kaina sa Barangay Bungsuan, Dumarao.
Nahibaluan nga ang mga ini ang lunsay mga membro sang Bungsuan Small Farmers Association kag nagaguha sadto ang ila mga pangalan sa intelligence report nga konektado ang mga ini sa rebelde nga grupo.
Sa ginpatigayon nga programa, ila nga ginklaro nga sila ang mga simple lamang nga mga pomuluyo kag mangunguma.
Kadungan sini, nagpahayag sila sang paghatag sang bug-os nga suporta sa mga programa sang gobyerno.
Aminado man ang pila sa ila nga matapos naangut ang pangalan sa komunista nga grupo, nangin dako ini nga problema ilabi na nga may himata sila nga maga-apply sang trabaho sa gobyerno.
Suno kay Col Laudemer Llanera, igapaidalom sa maid-id nga monitoring kag assessment ang amo nga mga indibidwal antes hatagan sang sertipikasyon nga nagapamatuod nga indi na sila konektado sa rebelde nga grupo.
Ang amu nga aktibidad ang gintambungan nanday CPPO Provincial Director Col Laudemer Llanera; 2nd Provincial Mobile Force Company Commander LTC Ferjen Torred; 12IB Batallion Commander LTC Jason Estrada; hepe sang Dumarao PNP nga si Police Captain John Almarino Bonior kag Punong Barangay Melchor Dampog sang Bungsuan, Dumarao.
