Davao City – Samdan ang onse ka mga sundalo human nabuthan og Improvised Explosive Device kun IED atol sa engkwentro sa Sitio Tinago, Brgy. Mt. Diwata, Monkayo, Compostela Valley Province alas 10 kaganinang buntag, Disyembre 26, 2018 diin karon usab nga adlaw sa anibersaryo sa Communist Party of the Philippines kun CPP.
Kini ang gikumpirma ni 10TH Infantry Division Philippine Army spokesperson Captain Jerry Lamosao atol sa pakighinabi sa DXDC RMN Davao.
Sa report, milungtad og 10 minutos ang inisyal nga engkwentro sa mga sakop sa 25th Infantry Battalion Philippine Army ug sa wala pa masutang ihap sa mga sakop sa Guerilla Front 20 ubos sa New People’s Army kun NPA apan ang engkwentro sa comval hingpit nahuman pasado alas 2 na karong hapon.
Matud ni Lamosao nga usa ka bayolasyon sa usa sa mga provisions sa International humanitarian law ang paggamit sa pikas pundok og anti-personnel improvised explosive devices (IED) atol sa engkwentro.
Subay niini, hugot nga gikondena sa 10th ID ang hinimuan sa NPA diin usab kagabii natala ang usa pa ka engkwentro sa Sta. Cruz Davao del Sur apan gikanayon nga wala sila nagkumpyansa gumikan dako gayud ang posibilidad nga himuong parte sa programa ang mga pagpangatake sa maong grupo.
Sa karon, gipangdala na sa balay-tambalanan ang mga samarang sundalo samtang ginasuta pa usab og adunay casualty sa pikas pundok gumikan adunay mga nakitang blood stains usab gikan sa rebeldeng grupo.
Gani wala usab nag undang karon ang tropa sa gobyerno sa pagpahigayon og hot pursuit operation aron mailhan ug madakpan og kinsa man ang responsable sa nahitabong pagpangatake sa nasangpit nga lugar.
RadyoMaN Renz Barbarona
