El provincial de Zamboanga del Sur amo ya fuede saca el alto estado del mga barangay na rehiyon del Zamboanga Peninsula que librao ya na problema de droga prohibido.
Base na records que ya hace sale el Mando Policia Rehiyunal Nueve, desdel total de 1,904 barangays na entero rehiyon nueve, el Zamboanga del Sur ya fuede saca 111 Totally Cleared Barangays, el pinaca-alto numero desdel rehiyon aura.
Asegun con el commandante del PRO9 Chief Supt. Billy Beltran, ya ordena le con su mga provincial directors para continua el campanya contra droga y dale mas coraje con el mga vivientes pella contra droga.
El PRO9 ya revela cay Segundo na Zamboanga del Sur amo el provincial de Zamboanga del Norte con 103 barangays limpio ya na droga prohivido; siguente el Zamboanga Sibugay con 25 barangays nuay mas droga ilegal, y ultimo el Ciudad de Zamboanga con un barangay lang desdel 98 el librao na problema de droga.
Mientras tanto, na 45 barangays chene el Isabela City, Basilan, nuay nigunos de esso el librao na problema de droga.
Ta continua adverti si General Beltran con su mga chief of police para continua el presente Campania y pricura libra con el mga barangay donde sila designao para elimina totalmente el problema del droga illegal aqui na rehiyon. – *Bhong Simbajon/RMN News*
