Pagadian City – Miabot sa 119 ka balay ang naugdaw sa nahitabong sunog alas 12:23 kagahapon sa udto sa purok Kahayag, Brgy. Dumagoc ning syudad sa Pagadian.
Sa inisyal nga report gikan sa Bureau of Fire Protection Pagadian City Central Fire Station nakadawat sila og tawag may labot sa maong sunog hinungdan sa pagresponde sa Fire Truck No. 5, apan naglisod kini pagsulod sa lugar gumikan sa daghanang sakyanan nga nakaparada ug sa kapi-ot sa dalan gumikan sa dikit-dikit nga panimalay.
Gumikan sa kadako sa kalayo nakaresponde ang mga firetrucks gikan sa Danlugan ug Tiguma Sub-Station, lakip ang mga firetrucks gikan sa lungsod sa Aurora, Dinas ug lungsod sa Tukuran niining probinsya.
Sa inisyal nga imbestigasyon nasayran nga nagsugod ang sunog sa balay ni Odie Golez, usa ka mananagat ug lumulupyo sa maong lugar. Partikyular nga nagsunod ang kalayo sa kwarto ni Jean Rose Golez apan ang lawak kinandaduhan rason nga nikatag ang kalayo kay gama man sa light materials ang balay sa palibot.
Sa duha ka oras kapin nga pakigbugno sa mga bombero gideklara nga fireout sa ground commander nga so Insp. Glenn Macarat.
Gibana-bana nga mobalor sa 800,000 ang damyos sa sunog hinoon walay gikataho nga namatay ug nasamdan sa maong trahedya.
Nipatong 145 ka pamilya ang apektado sa sunog ug 46 niini nagpabilin sa Balangasan Gym.
