11K ka pamilya sa Davao Region, apektado sa pagbaha

Davao City – Gikumpirma sa Office of the Civil Defense (OCD)-XI nga walay natala nga casualty sa nasinatiang pagbaha sa Davao del Norte ug Davao de Oro nunot sa Southwest Monsoon kun Habagat.

Sa pakighinabi sa DXDC RMN Davao kang Franz Irag, Information Officer sa OCD-XI, iyang gibutyag nga niadtong Agosto 19-20, 2023, muabot sa 10,999 families o 45,908 individuals ang naapektuhan sa pagbaha sa Davao del Norte partikular na sa Asuncion, New Corella, Dujali, ug Tagum City. Samtang, naapektuhan usab ang Monkayo sa Davao de Oro.

Matud ni Irag, sa apektadong pamilya, 215 niini ang nahikling sa evacuation center nga luwas na usab nga nakauli sa ilang pinuy-anan.

“Sa kaadlawon on August 20, ni-subside ra man pud dayon ang tubig-baha. So, for now, wala na ‘tay na-monitor nga naa pay nalubog sa tubig-baha nga mga area nga apektado sa pagbaha diri sa Region XI,” matud ni Irag.

Dugang sa OCD-XI official nga nakatala lamang og casualty niadtong August 18, 2023 sa Barangay Magdug, Governor Generoso, Davao del Norte diin duha ang patay ug duha ang injured tungod sa pagkatumba sa kahoy. Samtang nakatala usab og 7 partially damaged ug 2 totally damaged nga balay.

RadyoMaN Kirby Manzon