Kalibo, Aklan — Nadiskubrehan nga biktima it rape ro sangka 12-anyos nga ungang babaye matapos mapan-uhan ko anang maestra nga nagbahoe ro anang tiyan.
Ro biktima hay ihinago ta eang sa pangaeang Julia samatng rong suspek hay si Gerald parehong residente it sangka barangay sa Malinao, Aklan.
Sa pakikipag-angot it RMN News Team sa Punong Barangay ko lugar hay nabataon nana rong impormasyon mga Sabado nga adlaw.
Sa anang pagpangusisa hay nabalahuba rong hitabo matapos nga mapan-uhan ko maestra it biktima nga nagbahoe ro anang tiyan. Ginkutana it maestra ro unga ag dikato nagapanangison ro unga nga nagsugid.
Suno sa sugid ko unga ko mga buean it Abril imaw hay ginsugo ko anang nanay nga magbakae it mantika mga alas 7:00 rong gabii ag tag nagapauli eon imaw hay ginbantayan raya it suspek nga sangka 55-anyos, manog libod it isda ag kaeapit baeay it biktima ag gindaea sa kasagingan ag idto gin himuslan.
Matapos rong paghimueos hay dayon nga ginpauli it suspek ro biktima.
Ginhipsan ko biktima ro hitabo sa anang nanay bangud man sa pagpaeag it suspek nga kung magsugid ro biktima hay pagapatyon pati ro anang pamilya.
Matapos nga masayran ko anang maestra ro hitabo hay eagi sanda nga nagreport sa natundang Police Station.
Insigida man nga nagpatigayon it imbestigasyon rong mga kapulisan ag ginpa check-up ro nasambit nga unga ag idto nasayuran nga 4 eon nga buean nga nabdos ro biktima.
Sa makaron hay padayon pa nga nagapatigayon it imbestigasyon rong mga kapulisan para nga maipasaka kung kaso kuntra sa suspek pinaagi sa regular filing.
(Hungod namon nga uwa ginhingadlan rong pangaean it suspek ag ro barangay bangud man sa inyo it kapulisan ag punong barangay).
