Pinabuwag ni Bureau of Corrections (BuCor) Chief Nicanor Faeldon ang nasa 12 gangs sa loob ng New Bilibid Prisons (NBP) sa Muntinlupa.
Hakbang ito ng BuCor para pag-isahin ang mga magkakaaway na pangkat.
Kabilang sa mga gang na nakiisa ay ang Sigue-Sigue Sputnik, Oxo, Batang Mindanao, Batang City Jail, Sigue-Sigue Commando, Genuine Ilocano Group, Batang Mananalo, Batang Cebu, Bahala Na Gang, Hapi Go Lucky, Bicol Region Masbate at Batang Samar Leyte.
Ayon kay Faeldon – pumirma ng kasunduan ang mga gang na bubuwagin na ang kanilang hanay at hindi na masasangkot sa gulo.
Tiwala si Faeldon na tutupad sa kasunduan ang mga gang at magiging responsible sa loob ng Bilibid.
Plano rin ng BuCor na balasahin ang mga inmate sa iba’t ibang selda.
Isusunod na rin ang pagbuwag sa mga gang sa iba pang kulungan sa ilalim ng BuCor.
Umaasa ang BuCor na mababawasan ang mga krimen sa lansangan sa pagkakabuwag ng mga gang.
