Davao City – Nahibalik na denhe sa Davao City sakay sa gi-mobilisar sa dakbayan nga ‘sweeper flight’ ang ubay-ubay nga mga city residents kinsa unang natanggong didto sa Clark, Pampanga gumikan sa COVID-19 lockdown ug quarantine.
Matud ni Davao City Mayor Sara Duterte-Carpio, mokabat sa 150 ka mga pasahero ang luwan niini diin 120 kanila residente gayud sa syudad sa Davao.
“Nakapahigayon ta’g sweeper flights… gi-una nato…ang Clark because sila ‘tong pinaka-last nga naa na didto sa airport nga naabtan og travel ban diri sa atoang Davao International Airport. Nagpahigayon ‘ta kaganiha sa sweeper flight and 150 kabuok ang naa sa manifest nga niabot gikan sa Clark and 120 niini…Davao City residents or less tungod kay duna diay nag misrepresent sa ilahang address,” segun sa alkalde.
Ang tanang Davaoeños nga nisulod sa Davao International Airport mopailawom sa mandatory screening and quarantine requisites.
“Pagsulod nila, tagaan sila og contact tracing form and then i-fill up nila… and then, i-enroll sila sa ‘Stay Safe’ nga application kung duna silay smart phones and then pagkahuman, hatagan sila og symptoms screening card and then i-screen sila for Day 1 nila, i-check kung aduna silay ubo, kalentura, kalibanga and then kung wala, i-clear sila sa Day 1 nila. Ang next check up nila is Day 7 na…pagkahuman, kung walay symtoms, pirmahan ‘to siya sa doctor or sa BHW nga wala siya nag manifest ug symptoms for 14 days and then mao nato iyang clearance card,” dugang sa mayora.
Gibutyag usab sa local chief executive nga usaka Chinese businessman ang nag-sponsor sa sweeper flights alang sa May 4 ug May 6 nga schedule diin mokostar kini og P3.8M alang sa duruha ka mga sweeper flights.
RadyoMan Aimee Guinita
