Davao City – Dakong hagit karon sa Banaybanay Municipal Police station ang paggukod sa mga armado nga mipaulanan og bala sa panimay ni Barangay Panikian Kapitan Glen Paslangan sa miaging gabii.
Wala pa’y matumbok ang nga otoridad nga grupo sa pagpamanhig sa ba’y sa Kapitan nga gikaangin sa pag-umangkon nga si Alaysa Alonso, 13 anyos ug gitambalan na ospital karon.
Gipaningkamotan sa kapulisan sa lungsod nga ma-establisar ang motibo sa krimen aron mailhan ang mga suspetsado nga anaa sa likod sa pagsuway og patay sa kapitan.
Subay sa inisyal nga imbistigasyon, kalit lamang matud pa mibutho ang armadong kalalakin-an ug dayon gipaulanan og bala ang pinuy-anan sa amahan sa barangay.
Maayo na lang kay wala maigo ang kapitan ug lakip na ang iyang pamilya gawas sa dalagita.
Ang kapulisan nakarekober og 27 ka basyo sa M16 rifle armalite ug pito ka basyo sa 9mm nga maoy gigamit sa mga armado sa ilang pagpamanhig sa kapitan.
Human sa maong panghitabo, abtik ang mga armado sa pag-iktad hinungdan nga wala na sila maabti pa sa mirespondeng kapulisan sa Banaybanay Davao Oriental.
RadyoMaN Joel Viray
