Davao City – Na-rescue ang 13 ka batang Japanese nationals niadtong Mayo 2, 2018 human nga matud pa nabiktima sa giingong human trafficking sa mga kalahi ra usab nila nga mga Japanese nationals sa Purok 5-Camotes, Brgy. Toril Babak District, Island Garden City of Samal.
Sa report gikan sa Police Regional Office kun PRO XI, gihimo ang rescue operation sa Inter-Agency Council against Trafficking in Persons (IACAT) Region XI gilangkuban sa PNP, DSWD, Bureau of Immigration, CSWD ug DOJ silbing tubag sa reported case sa mga nawala nga Japanese Nationals.
Giila ang mga suspek nga mao ang mag amahang sila Hajime Kawauchi, 61 anyos, Yuya Kawauchi, martial arts trainer, pulos mga Japanese nationals lakip usab nasikop ang usa ka Lorena Arbiz Mapagdalita, usa ka guardian ug pulos mga residente sa nasangpit nga lugar.
Nadiskobrehan nga dunay iligal nga aktibidad subay sa human trafficking sa sulod sa pasilidad nga gitukod sa mga suspek sa nasangpit nga lugar.
Dugang niini, nasayran nga niadtong miaging tuig gidala sa syudad sa Davao ang mga biktima ug mibalhin sa Samal niadtong bulan sa Oktubre aron magtuon og karate base ug English subay sa saad sa mga suspek apan gihimo silang trabahante ingon man nakasinati og mga pagpanglutos.
Sa karon, anaa na sa kustodiya sa DSWD ang mga batang na-resuce samtang balhug na karon sa prisuhan ang mag-amahan ug gipasaka batok kanila ang kasong Republic Act 10364 kun anti-trafficking in persons act of 2012 ug RA 7610 kun anti-child abuse law ngadto sa Office of the City Prosecution, Babak, Samal apan gi-dismiss ang kaso batok kang Mapagdalita tungod sa walay igong ebidensya.
RadyoMaN Renz Barbarona
