Gipadala sa Misamis Oriental Rural Electric Cooperative o MORESCO 1 sa lalawigan sa Capiz sa Visayas ang ilang 14 ka mga linemen aron motabang pag-ayo sa natumba nga mga poste ug naputol nga linya sa kuryente nga giguba sa Bagyong Ursula niadtong Disyembre sa milabayng tuig.
Dala sa maong mga crew ang ilang duha ka Boom Truck nga kompleto sa mga gamit.
Matud ni Allan Sofocado, Board Chairman sa Moresco 1 nga dili mopa-uli sa Misamis Oriental ang ilang mga linemen hangtud nga dili mobalik sa normal ang supply sa kuryente sa Capiz Electric Cooperative kon Capelco.
Gibutyag usab ni Engineer Juvy Joven, Acting General Manager sa Moresco 1 nga nag-decision ang Management sa Moresco nga motabang sa power restoration operation sa Capelco aron madali ang pagpabalik sa kahayag sa Western Visayas ubos sa ilang Task Force Kapatid Ursula.
