Davao City – Dismayado si National Police Commission (Napolcom) national adviser Bishop Ariel Coleto sa mga pulis sa duha ka siyudad sa Metro Manila kinsa nasakpan sa akto nga natulog human nag-inom samtang nagduty.
Segun ni Bishop Coleto, ang ingon ani nga mga pulis wala gyoy ulaw gumikan kay wala man lang sila batia og kaikog sa ilang pag-inom ug pagtulog sulod sa mga presinto samtang on-duty niadtong tungora.
Kahinumdoman, mismo si NCRPO Director Oscar Albayalde nakasakop sa 14 ka mga pulis sa Pasay ug sa Muntinlupa nga nahinanok og katulog human nahubog hinungdan sa ilang pagkatanggal sa serbisyo.
Wala mahigugma ang 14 ka pulis sa ilang trabaho kay kun anaa pa sa ilang kasing-kasing ang pagserbisyo ug pagprotekta sa katawhan dili unta sila makahimo sa salawayon nga buhat.
Ang gibuhat sa 14 ka pulis klaro kaayo nga wala sa ilaha ang dedikasyon ug kumitado sa trabaho isip mga sakop sa nasudnong kapulisan.
Busa dili na sila angay pasanayon ug padugayon sa serbisyo ug gikinahanglan na ibton sila gikan sa sanga sa punuan sa Philippine National Police aron dili sila makatakod sa mga nagtinarong sa trabaho.
Dugang sa Napolcom adviser nga naglatay gihapon sa kaugatan sa 14 ka pulis ang kinaiya sa kumpiyansa ug mañana habit nga nasunod gikan sa batasan sa mga kastila.
Ug mao na kini ang tukma nga panahon aron rebyohon ang mga palisiya sa PNP sa tumong nga dili na masubli ang nahimo sa mga pulis sa Pasay City ug sa Muntinlupa City.
Dungan unya sa pag-usab sa mga palisiya mao ang pagpabug-at sa mga silot kay walay luna sa PNP ang badlungong ug iskalawag nga mga pulis.
Nagtoo si Napolcom adviser Bishop Coleto nga ubos sa administrasyon ni Pangulong Rodrigo Duterte hingpit matarong ang mga pulis ug labaw na sa hiwi og mga binuhatan.
RadyoMaN Joel Viray
