Davao City – Muabot sa 14 ka mga indibidwal ang naharang sa Davao International Airport (DIA) human nga nagpakita og peke nga resulta sa RT-PCR (reverse transcription polymerase chain reaction) test.
Matud ni Davao City Mayor Sara Duterte-Carpio, ang maong ihap natala gikan niadtong Marso 23, 2021, diin misumada kini sa 14 human nadugang ang duha (2) ka indibidwal nga fake RT-PCR test holder kagahapong adlawa (Marso 29, 2021).
Gipasabot sa Alkalde nga dobleng problema ang atubangon sa nahisgutan diin gawas sa kaso, mugasto na usab sila alang sa tinuod nga RT-PCR test labi na nga mandatory ug wala nay libreng testing pag-abot sa DIA.
“Kung nigasto na man lang mo og money para magpabuhat og fake nga RT-PCR, gamiton nalang ninyo inyong kwarta nga mag pa-test og tinuod sa RT-PCR. Kay mao ra man gihapon magka problema mo pag abot ninyo diri,” sulti sa Mayor.
Kahinumduman nga niadtong Marso 23, 2021 gipatuman alang sa mga inbound passengers ang ‘test before flying’ sa DIA labi na nga nagkataas usab ang COVID-19 cases sa National Capital Region (NCR).
RadyoMaN Kirby Manzon
