Davao City – Miabot na sa 14 ang patay sa nahitabong bangga alas 12:30 kagahapong adlawa tali Hino Utility Vehicle ug Ten Wheeler Truck sa may Sitio Lantawan, Brgy. Astorga, Sta. Cruz, Davao del Sur.
Sa ekslusibong pakighinabi kang P/Senior Insp. Mary Grace Martinez, officer-in-charge sa Sta. Cruz PNP, gikumpirmar niini nga nakabsan sa kinabuhi si Ariel Caña ensaktong alas 6:16 kagabii sa Southern Philippines Medical Center (SPMC).
“Ang dead on the spot po ay 12, dead on arrival ang isa sa Digos Provincial Hospital… inilipat sa Digos Doctors hospital and from Digos Doctors, tatlo ang dinala sa SPMC at sa tatlo na yun sa kasamaang palad namatay din po yung si Ariel Caña,” sigun ni Martinez.
Saysay ni Martinez atol sa ilang inisyal nga interbyu sa driver sa truck nga si Theodoro Batiocan, giingon niini nga overspeeding ang Hino Utility Vehicle kinsa ilang gikasugat ug gitataw niini nga aduna lamang silay 20-30kph nga dagan.
Sumala sa OIC sa Sta. Cruz Pnp, gikan South paingon North ang maong truck nga puno og karga sa construction materials samtang gikan North pa-South ang maong Hino Van karga ang 17 ka mga pasahero.
Gisulayan matud pa sa Sta. Cruz Pnp og interbyu ang mga nabiling buhi apan nagdumili kini gumikan sa trauma gani sa pagkakaron padayon pa ilang imbestigasyon.
Samtang luwas na sa makuyaw nga kahimtang ang usa sa mga naangol nga si Benji Lumanta, 8 ka bulan nga trabahante sa Franklin Bakers, ug nanimuyo sa Sto. Tomas, Davao del Norte.
Sa interview sa DXDC news team kang Lyn Lumanta, igsoon ni Benji Lumanta, gisaysay niini nga giingon ni Benji nga naglingkod kini sa likod nga bahin sa maong van diin sumala pa nagdagan sa 80kph gani sa pagkabangga, nakuyapan kini.
Sa pagkakaron, anaa pa sa traumatic center sa SPMC ang driver sa van nga si Ariel Presores kinsa padayon pang ginatambalan ug posibleng muatubang sa kasong Reckless Imprudence Resulting to Multiple Homicide kung mapamatud-ang sad-an kini.
RadyoMaN Jason Amisola
