Roxas City, Capiz – Ginpahayag ni Capiz DepEd Division Superintendent Dr. Roel Bermejo nga ginapanan-aw nga magataas pa ang numero sang mga estudyante bangud may yara pa nga mga nagapa-enroll.
Masobra sa 147 ka libo ka mga estudyante sa kindergarten, elementarya kag high school ang sa karon naka enroll sa mga pampubliko nga buluthuan sa idalom sang Capiz Schools Division sa pagbukas sang klase sang Hunyo 3.
Suno kay Bermejo nga padayon man ang ila pagbaton sang mga transferee kag mga naulihi sa pagpa enroll nga mga estudyante.
Suno man sa iya nga ang Capiz Schools Division ang may masobra sa 6,500 ka mga manunudlo sa karon, apang masobra pa sa 100 ka manunudo ang ila iga-hire para sa pagtudlo sa Senior High School.
Suno pa sa iya nga nangin matawhay ang pagsugod sang klase sang Hunyo 3 bangud nangin handa ang mga buluthuan para diri.
Wala naman sila sang may napagkit nga mga problema angot sa pagbukas sang klase maluwas sa pila ka mga palamangkutanon sang mga ginikanan tuhoy sa senior high school voucher program, kag polisiya sa pag-transfer kag suktanay sa eskwelahan.
Liwat man niya nga ginpaabot sa publiko ang ila hugot nga implementasyon sa No Collection kag Child Protection nga patakaran sang DepEd.
photo(c)- Dr. Quima Villa
<www.avast.com/sig-email?utm_medium=email&utm_source=link&utm_campaign=sig-email&utm_content=webmail>
