General Santos City–Gilayong gi-turnover sa mga personahe sa Police Station 3 ang usa ka Grade 9 Student nga nasikop nila sa ilahang gipahigayon nga buy-bust operation alas 10:00 ang takna sa gabie sa area sa NLSA Road, Barangay Lagao ning syudad kung asa napalitan kini ug pina-ugang dahon sa marijuana nga nag kantidad ug 200 pesos.
Sumala pa ni Police Lieutenant Felix Minion III ang officer in charge sa Police Station 3 nga ang pagkasikop sa nahisgutan ang resulta sa una na nilang mga operasyon kung asa gitudlo sa una nilang dinakpan nga ang nahisgutang 15 anyos ang maoy gigikanan sa ilahang marijuana hinungdan nga gipahigayunan ug operasyon.
Sa karon ginasuta pa sa kapulisan kung kinsa ang ginakuhaan ug droga sa menor de edad nga anaa lang usab dinhi sa Gensan.
Dugang pa ni Lt. Minion nga nagsugod lang matud pa sa pag tilaw-tilaw ug marijuana ang suspect aron nga dili kini mamanol apan naadik matud pa kini hinungdan nga nagsugod usab ug baligya aron adunay ikagasto sa iyahang bisyo.
Sa karon gipaabot nalang sa kapulisan ang resulta sa gipahigayong pagsuta sa mga personahe sa CSWDO kung nasayod ba ang nahisgutan sa iyahang gihimo ayha kini makapasakaan ug kasong pagsupak sa RA 9165, sec 5 sa art II.(Dave Silagan)
