Gidayeg ni Cagayan de Oro City Mayor Oscar Moreno ang usa ka batan-ong swimmer ning syudad.
Kini human nahimong gold medalist sa international swimming competition nga gihimo niadtong Agosto 25 hangtud 26 sa Singapore.
Matud sa Cagayan de Oro City Information Office nga ang swimmer mao ang 15 anyos nga si Merrell James B. Neri, Grade 10 junior high school student sa Cagayan de Oro College Phinma.
Gawas sa usa ka gold medal nakuha usab ni Neri ang lima ka silver medals atol sa 14th Singapore Island Country Club Swimming Championships.
Si Neri naka gold medal sa 200m freestyle samtang ang lima ka silver medals sa 50m freestyle, 100m freestyle, 50m breast stroke, 100m breast stroke and 4×50 relay kung asa nilangoy kini batok sa mga  best swimmers gikan sa China, Malaysia, Britain, Japan ug Singapore.
Ni-qualify sa maong international competition ang 15 anyos human nidaog sa 2nd Cagayan de Oro Swim Meet nga gihimo sa Kagay-an Lawndale Spring Resort niadtong Hunyo 2018 diin ang host mao ang lokal nga kagamhanan sa Cagayan de Oro.
