Patay ang 15 anyos nga lalaki matapos ginhatuk-hatuk sang buno sa Barangay Bayombong, Lambunao, Iloilo kaina sang aga.(Mayo 2)
Alas 11:30 sang aga sang makit-an ni Elena Leygo nga nagapaligo sa kaugalingon nga dugo ang biktima kag madamo sang pilas sa lawas tuga sang pagbuno.
Base sa imbestigasyon sang Lambunao PNP, ginpahayag ni Police Staff Sgt. Ramon Legayada nga alas 8 sang aga may nabatian ang pila ka pumuluyo sa barangay nga may nagapangayo sang bulig apang ila lamang ginbalewala kag alas 11 pasado na sang malabayan ni Elena Leygo ang biktima.
Samtang ginpahayag ni Legayada nga pasado alas 5 kaina sang hapon boluntaryo nga nagsurrender pinaagi sa mga barangay officials ang suspek nga ginkilala kay Menardo Leygo, 18 anyos sang amo man nga lugar.
Suno kay Legayada nga isa sa ginalantaw nga motibo sa krimen amo ang love triangle kon sa diin ginapahayag nga ex sang suspek ang nobya sang biktima.
