Nakuryente ang 15-anyos nga bata sa Brgy. Santiago, Barotac Viejo, Iloilo sang Dominggo, Oktubre 15, 2017 matapos naka-uyat sa live wire nga yara sa isa ka private property.
Suno kay Jemlin Azucena, 34 anyos, sang nagpapuli na sila halin sa lawud upod ang biktima nga si alyas Toto, naka-uyat ang biktima sa live wire bangud man sang mamunog nga ulan.
Ginbuligan pa ni Azucena si Toto apang pati siya ang nakuryente.
Nahingagaw nga magabot ang saksakan sang kuryente pinaagi man sa bulig sang ila upod apang nalipong si alyas Toto.
Ginpahayag ni Azucena nga ginkudalan sang tag-iya ang iya propedad kag ginbutangan sang live wire bangud nasabaran ini sa mga nagapangisda nga nagalabay sa lugar padulong sa pantalan.
Ginahingyo karon sang mga mangingisda ang nagapanag-iya sang lupa nga si Sandra Dilag nga hatagan sila sang alagyan nga wala sang sablag bangud ini lang ang ila alagyan pakadto sa ila sakayan ilabi pa nga mamadlos ang hangin.
(photo from web)
