15 ka barangay sa Pitogo, gideklara nga drug cleared

Pitogo, Zamboanga del Sur – Moabot sa 15 ka mga Barangay sa lungsod sa Pitogo ning probinsya sa Zamboanga del Sur ang gideklara nga luwas na sa presensya ng droga pinaagi sa Regional Oversight Committee on Barangay Drug Clearing Operations.
Atol sa deklarasyon nitambong ug nisaksi ang mga opisyal sa maong lungsod, Hepe sa Kapulisan, Municipal ug Barangay Anti-Drug Abuse Council members, Department of Health, Department of Interior and Local Government ug Philippine Drug Enforcement Agency.
Gipaila sa Pitogo PNP ang mga Barangay nga bag-o lang gideklara nga ‘drug cleared’ mao ang Poblacion, Panubigan, Lower Panikian, Punta Flecha, Limbayan, Matin-ao, Upper Panikian, Tongao, Liguac, Colojo, San Isidro, Sugbay Dos, Balong-Balong, Liasan ug Balabawan.
Base sa Section 8 sa Dangerous Drugs Board Regulation No. 3, series of 2017, nakapasar ang nahisgutan nga mga barangay sa basehanan nga wala nay’drug supply, transshipment activities, drug laboratory ug warehouse, chemical warehouse, marijuana cultivation site, drug den, drug pusher, protector, financier ug mga user sa nahisgutang lugar.