Magatukod ang Philippine Army sang 15 ka Citizen Armed Forces Geographical Unit ukon CAFGU detachments sa isla sang Panay.
Ini bilang pagpanghanda para sa 2019 mid-term elections.
Igapalapta ini sa nagkalain-lain nga mga lugar sa bug-os nga isla sang Panay bilang dugang sa 42 ka naga-exister nga mga detachments kag ginalauman nga mahuman ang mga ini antis matapos ang karon nga tuig.
Igapahamtang ang mga ini sa mga banwa sang Calinog, Maasin, Lambunao kag Miag-ao sa Iloilo; kag sa mga banwa sang Tapaz kag Dumarao sa Capiz kag sa probinsya sang Aklan.
Luyag sang Philippine Army nga ma-pressure ang armado nga grupo agud mauntat ang mgha bayolente nga mga insidente sa ginalauman nga mga dalagku nga kahiwatan kasubong sang eleksyon sa masunod nga tuig.
Suno kay Philippine Army 301st Infantry Brigade commander Benedict Arevalo, ang dugang nga detachment ang magapabaskog sa seguridad sa bug-os nga isla sang Panay.
Sa karon ginabanta nga mga 500 ka CAFGU personnel ang nagabantay sa mga detachments.
(photo from web)
