Davao City- Mokabat na sa 15 ka mga sunog ang nahitabo sa dakbayan sa Davao ning bulan sa Marso tuig 2021.
Segun ni Davao City Fire District chief FSupt. Alex Pamaybay, naka- red alert status ang Bureau of Fire Protection XI.
“Ang Bureau of Fire Protection always on red alert status tungod wala man tay gipili nga emergency,” matud niini.
Sa 15 ka mga natalang sunog, ang Barangay Duterte Agdao ang pinakadako diin nagdeklara ang BFP XI og City-wide general alarm.
Dili mo-ubos 300 ka mga balay ang naugdaw ug kapin 300 ka pamilya ang na-dislokar ug nakitang hinungdan mao ang electrical arching.
Mokabat sa P3.7M ang damyos sa maong sunog sa Agdao.
Samtang nisaka sa 9 ang mga natalang namatay sa mga sunog sa dakbayan human nadugang sa ihap ang giingong nagpakamatay ang suspect sa sunog sa Bunawan ning syudad.
Apan gibutyag ni Pamaybay nga mas ubos ang ihap sa sunog sukad Enero hangtod Marso 2021 nga adunay kapin 50 kung itandi sa susamang bulan sa 2020 nga adunay 99 ka mga ihap sa sunog.
RadyoMaN Aimee Guinita
