15 ka tawo ha Samar naospital tungod han red tide

TACLOBAN CITY – Igindalagan ha hospital an 15 ka tawo tungod nga nakakaon hin tahong nga may shellfish poison o nadarahigan han red tide ha Probinsya han Samar bis pa man nagpagawas na hin warnings an Bureau of Fisheries and Aquatic Resources o kun BFAR.

Ha 15 nga naospital, 4 dinhi in tikang ha Catbalogan City, 7 ha Tarangnan, 3 in tikang ha Daram, ngan usa naman in tikang ha Sta. Rita ha Samar. Ngatanan nga biktima in nakarekober naman matapos an pira ka adlaw nga medikasyon ini sumala han BFAR.

Mahihinumduman nga usa na nga bata an namatay ngan 45 an naospital ha Samar dida han Setyembre tungod han red tide.


Sumala kan BFAR Assist. Regional Director Justerie Granalie, diri nabali iton mga residente bis maaram na hira nga may red tide.

Mahugot naman an pagdumara yana hin fisheries checkpoint han BFAR ha koordinasyon han Maritime Police, Philippine Ports Authority, Police Public Safety Batallion ngan Philippine Fisheries Development Authority ha rehiyon.

Unom la gihapon nga baybayon ha Sinirangan Bisayas an ngada yana positibo han red tide. Amu ini an Irong-Irong Bay, Maqueda Bay, Villareal Bay, ngan kadagatan han Daram ha Samar, Carigara Bay naman ha Leyte ngan Matarinao Bay ha Eastern Samar.

Facebook Comments