Sa interview sa DXDC RMN Davao kang Eileen Joy Manatad, Operations Head – Early Warning Officer sa LDRRMO Compostela, iyang gibutyag nga Lunes pa lang sa gabii, Enero 15, 2024 sa dihang nagsugod ang pag-ulan, duna nay mga gipangbakwit sa ilang tagsa-tagsa ka mga evacuation center.
Alas 9:00 sa buntag kagahapon, Enero 16, muabot sa 949 ka pamilya o anaa sa 1,800 ka mga indibidwal ang nahikling, diin migamit na og mga kahimanan ang Local Government Unit (LGU) tungod sa taas nga lebel sa tubig baha.
“Naay portions nga taas gyud kaayo (ang tubig), kining daplin sa mga sapa, naay daplin sa creeks. Naay mga critical gyud nga level ang tubig. Mao ‘to nga kinahanglan nato magpadala og mga rubber/plastic boats kay dili na gyud sya pwede nga magbaktas ang mga tao nga ibakwit. Isakay na gyud sila,” saysay ni Manatad.
Dugang sa LDRRM Officer nga gawas sa pagbaha, duna usay natala nga landslide sa National Highway gikan sa Compostela padulong Cateel nga parte sa Barangay Ngan ug Barangay Panansan. Gipasalamat usab sa otoridad nga walay gika-report nga injured o casualty tungod sa kalamidad.
RadyoMaN Kirby Manzon
