Naglab-ot na sa 16 ka kabanwahanan sa probinsya sang Iloilo ang ginakabig sang Commission on Elections nga ‘election hot spots.’
Base sa record sang Comelec may tatlo ka mga banwa ang yara sa red category nga ginalakipan sang Calinog, Maasin kag Lemery.
Samtang siyam naman ka mga banwa ang yara sa orange category nga ginalakipan sang San Joaquin, Igbaras, Tubungan, Alimodian, Miag-ao, Janiuay, Leon, Bingawan kag Lambunao.
Kag ang apat ka mga banwa nga yara sa yellow category amo ang Sara, Estancia, New Lucena kag San Dionisio.
Suno kay COMELEC Iloilo Election Supervisor Roberto Salazar, nga kon ang isa ka lugar may yara sang ‘intense political rivalry,’ posible may presensya sang ‘private armed groups,’ may insidente sang ‘election related violence’ sang nagligad nga pinili-ay kag may presensya sang rebelde nga NPA yara ini sa “yellow category”.
Samtang yara naman sa orange category ang lugar kon may presensya sang ‘terrorista nga grupo.’
Kag kon kombinasyon sang yellow kag orange category ang sitwasyon sang lugar, yara na ini sa Red category.
