Pagadian City – Mokabat sa 160 ka mga medical workers sa Zamboanga del Sur Medical Center ang naturukan sa Sinovac vaccine kagahapong adlawa, sa pag-arangkada sa vaccination rollout sa maong government health facility.
Gikan sa maong ihap, 15 ka mga doktor ang midawat sa bakuna sa pagpanguna sa mismong chief of hospital sa ZDSMC nga si Dr. Anatalio Cagampang Jr, ang pinakaunang Pagadianon nga midawat sa COVID-19 vaccine.
Gisundan kini sa uban pang mga health workers sama sa nurses ug mga hospital staff. Sumala ni Cagampang nga pagahimoon ang pagbakuna sa tibuok semana hangtod mahurot ang 606 doses sa Sinovac nga gitagana sa mga medical frontliners.
Ang vaccination roll-out sa probinsya nagsugod adlawng Dominggo nga gipahigayon alang sa mga health workers sa Margosatubig Regional Hospital. Si Dr. Gino Bancoro gikan sa maong hospital ang pinakaunang Zambosurian nga naturukan sa bakuna batok COVID-19.
