17 anyos nga babayi ginpamumuno, patay ha Abucay

12747

TACLOBAN CITY – Ginpamumuno-patay an usa nga minor de edad ha Brgy. 91 Abucay, Tacloban City dida han sabado, October 19.

Ginkilala an biktima nga hi Juliah Casandra Quisumbing, 17 anyos, residente han nasabi nga lugar.


Sumala kan Brgy. 91 Abucay Captain Ricardo Benitez, nagbabaktas hi Quisumbing tipauli ha ira panimalay alas 9:00 han gab-i tikang ha St. Therese School.

Nagawas naman ha inisyal nga imbistigasyon han mga kapulisan, ha masirom nga banda han kalsada, ginsundan hi Quisumbing han lalaki nga nakajacket ngan iginka-aragaw an iya cellphone.

Nakig-agaway daw hi Quisumbing ha suspek pero dida han gumuliat na hi Quisumbing, mayada dara nga matarom nga butang an suspek ngan ginbuno duha kabeses hi Quisumbing ha iya dughan rason han iya pagkamatay.

Mayada naman umagi nga motorsiklo nga gindadrayban ni Eric Cabos, taga Kassel City, pumara hi Cabos para makit-an an panhitabo pero han pagharani niya ha crime scene, ginbuno gihap hiya han suspek ha iya dughan.

Nagpapatambal na yana hi Cabos ha hospital.

Sumala kan P/Capt. Daniel Polo, Tacloban PNP station 2 Abucay commander, robbery or hold-up an nagawas nga panuyo han suspek ha 17 anyos nga biktima.

Pero ha natabo nga insidente, waray kadara han suspek an cellphone ni Quisumbing.

Siring ni Polo, mayada na hira duha (2) nga lead suspek hini nga krimen.

Ha pagka yana, ginbibiling na nira ini nga mga suspek. (With reports from Rizza Calaay)

Facebook Comments

From Advertisers