TACLOBAN CITY – Makasurubo man an pagkamatay ni Kobe Andrei Tejero, 17 anyos para ha iya pamilya pero blessing naman ini para ha makarawat han iya eye tissue.
Gindonar han pamilya ni Kobe an iya corneas ha Eye Bank Foundation of the Philippines, pira ka oras an nakalabay han iya pagkamatay dida han August 20 han maconfine hiya ha Eastern Visayas Regional Medical Center (EVRMC).
Hi Kobe in taga Borongan City, naaksidente hiya kalsada dida han August 15, naangkon an major head injury.
Nahikalasan man an pamilya ni Kobe han pagkamatay hini, sumala han iya nanay nga hi Mariso, 47 anyos.
“Na-shock kami han iya pagkamatay. Hiya an ak eldest son. Pero nagdecide kami nga igdonate an iya mata ngan iba niya nga organs, ginhuringan ko hi Kobe nga makakabulig hiya ha iba.” Ha interview han Leyte-Samar Daily Express.
Grade 12 senior high student hi Kobe han Eastern Samar Comprehensive High School.
Labot la han corneas han iya anak, gindonate gihapon han pamilya hini an kasing-kasing ni Kobe.
Matapos an ira desisyon nga igdonate an mata ni kobe, gin-approach gihapon hira han doktor han EVRMC kun diin mayada medical center for organ donation kun willing gihapon an pamilya igdonate an organs han ira anak.
Hi Mariso in tigda nga napasiring nga YES.
“Diri ako maaram kun kayano napasiring ako nga yes.”
Nag istorya hira hin maupay upod an iya asawa.
“Nag pray kami ngan umabot kami ha desisyon nga igdonate an iya organs. Mayada tawo nga diri namon kilala nga makakabulig para humalaba ngan magpadayon han iya kinabuhi. Nag agree an akon pamilya.”
Dugang ha pamahayag ni Mariso, “mahigugmaon ngan mabuligon hi Kobe. Maaram ako nga happy hiya nga igdonate namon an iya mata ngan kasing-kasing para hadton nga nagkikinahanglan”
Matapos an operasyon, ginpakita ha ira han doktor an gutiay nga jar kun diin nakabutang an mata ni Kobe ngan waray hira mahadlok o ma-sad. Sumiring lugod hira nga “Hi Kobe”.
Nagpasalamat an EBFP ha pamilya ni Kobe kun diin hi Kobe an syahan nga eye donor dinhi ha Region 8.
No pains, no regrets siring pa man ni Mariso.
Samtang, ginlubong na an patay nga lawas ni Kobe dida han August 31 ha Borongan City.
