Report ni: Jennifer Palomo Debaja
Arestado ang 17 ka Pinoy sa Italy kag 30 pa ka iban sa ginpatigayon nga operasyon sang mga Carabinieri sa Roma sang kaagahon sang Disyembre 12, 2018.
Isa ka “big time”nga criminal organization ang nahulog sa kamot sang kapulisan. 47 tanan ang arestado sa pagbaligya sang nagkalain lain nga klase sang droga.
Kaupod sa mga arestado ang 17 ka pinoy, 29 ka mga Italyano kag isa ka Nigerian national.
Sa ginpatigayon nga joint operation sang Carabinieri Gruppo di Roma kag sang Compagnia di Viterbo, paagi sa search warrant nga gin isyu sang GIP Tribunale di Roma, nag madinalag-on ang nasambit nga raid.
Narekuber ang gina banta 360 gramos nga shabu nga gina patihan pwede gid ma-repack sa 3,600 ka sachets kag may street value nga €180,000.
Nakumpiskar man ang nagkalain-lain nga droga pareho sang cocaine, speed, hashish kag marijuana kag cash nga nagblab-ot sa €11,000 nga ginapatihan benta sa pagbaligya sang droga pati man ang pila ka drug paraphernalia.
