Sa interbyu sa DXDC RMN Davao kang Police Master Sergeant Helenico Alaba, traffic investigator sa Mawab MPS, gibutyag niini anaa sa 18 ka indibidwal ang sakay sa bus (Jian Liner) apil na ang driver nga si Oscar Velasco, 65 anyos, residente sa Barangay Poblacion, Compostela, Davao de Oro.
Matud sa imbestigador nga gikan Compostela ug padulong Davao City ang bus ayha nahitabo ang insidente sa kurbada nga dalan, diin matud sa mga nakasaksi, kusog-kusog ang dagan sa sakyanan.
“Pagkurbada sa (bus), nahulog sa shouldering pa-right. Unya padulong man sya’g Davao. Pagkahulog sa shouldering, naa man toy lubak didto. Niuntol. Unya nalubag niya padulong sa left. Unya wala na siguro sila ka-brake ang driver, nidiretso didto sa pangpang, kadtong cliff gamay – nahulog,” saysay ni Alaba.
Dugang sa imbestigador nga gi-abaga usab sa bus company ang pagpa-ospital sa mga pasahero nga nakahiagom lamang og minor injuries.
Subling gipahinumdom sa kapulisan sa mga motorista ang pagdoble amping aron malikayan ang disgrasya sa kadalanan.
RadyoMaN Kirby Manzon
