TACLOBAN CITY – Ginbuno patay an binatilyo han adlaw mismo han kapaskuhan, nahinabo an insidente ha Brgy. 62-A Kadungganan, Sagkahan Tacloban City alas 2:40 han amagahon kasangkulop.
Ginkilala an biktima nga namatay nga hi Roy Vince Ramos, 19 anyos, usa nga estudyante ngan residente ha nasabi nga barangay.
Ginkilala naman an usa pa nga biktima nga hi Nilo Lebanan, 31 anyos ngan residente gihap ha nasabi nga barangay.
Ginkilala naman an suspek nga hi Mario Movilla, 31 anyos residente gihap ha 62-A Kadungganan Sagkahan.
Ha imbistigasyon han Tacloban City Police Office, pumalit han beer nga irimnon an duduha nga biktima, samtang ini naglalakat ha kakalsadahan tigda nga umabot an suspek ngan nagkamayada debate, han mapaso na an ira confrontation bumunot an suspek hin kutsilyo ngan ginbuno an duduha nga biktima. Naangkon han 19 anyos nga hi Ramos an binun-an dapit ha iya tiyan nga nagresulta naman han iya kamatay. Samtang hi Lebanan, naigo ha iya talikuran ngan yana in padayon pa nga ginbubulong.
Sumala kan PCInsp. Rex Cantillep, tagapagyakan han Tacloban PNP, magiging witness an usa nga biktima para han makusog nga kaso nga igpapasaka kontra ha suspek.
“Matapos ngani iton aton imbistigasyon pwede naton pasakahan either homicide or murder an suspek para hadton namatay nga biktima ngan frustrated murder or frustrated homicide liwat para han usa.”
Ha pagka yana arestado na an suspek. Sagdon ni PCInsp. Cantillep yana nga holiday season, ayaw igsaka ha ulo iton makahurubog nga irimnon nga magreresulta hin diri maupay nga buruhaton. Maglipay la unta ngan waray away.
