Sa interbyu sa DXDC RMN Davao kang Rochie Poblacion, igsoon sa biktima, wala kini kasayoran nga nagtrabaho na diay sa usa ka restaurant sa Cebu si Rhea ug nagpatabang kini nga maka-book og flight kay siya mutambong og bunyag ug birthday sa Panabo.
“Sige sya’g kulit nga magpa-book og ticket, hangtud nga na-book na gyud na ko sya’g ticket. Ana sya nga i-book nako kay mouli ko. July 21, naka-book na gyud og ticket. Pauli na unta sya sa Davao kung wala ni nahitabo,” emosyunal nga sulti ni Poblacion.
Gibutyag ni Rochie nga subay sa inisyal nga resulta sa awtopsiya, gihiktan og goma ang liog sa biktima nga posibleng usa sa rason sa iyang kamatayon. Posibleng mudagan pa usab og duha ka semana ayha makuha ang kumpletong resulta sa awtopsiya.
“Wala pa sa amoang kamot ang iyahang full result sa autopsy pero sa cause of death nga gikan sa doktor, kadto iyahang liog gihiktan og goma. Mao ‘toy hinungdan sa iyang kamatayon,” gibutyag sa igsoon.
Sa pagkakaron, padayon usab ang ginahimong imbestigasyon sa kapulisan ug pagkolekta og lig-on nga ebidensya kalabot sa nahisgutang krimen.
“Nanghinaut gyud mi nga mahatagan sya’g hustisya kay sakit kaayo sa amoang pamilya samot na sa akoa nga iyahang ate ug ako gyoy nagpa-eskwela ani akong manghud. Sakit kaayo magtan-aw, magsud-ong sa iyang kamatayon nga iyahang dagway dili na halos mailhan,” pamahayag sa magulang sa biktima.
Gitakdang ipahilona ang patay’ng lawas sa biktima sa lugar sa ilang inahan sa Misamis Oriental sa Cagayan de Oro City. | RadyoMaN Kirby Manzon
