Davao City – Balik sa prisohan ang mga na-rescue nga indibidwal sa Davao Oriental Provincial Jail sa Purok Maligaya, Barangay Sainz, Mati City human sa nahitabong jail break niadtong Agosto 14, 2021.
Sa interbyu sa DXDC RMN Davao kang Police Major Bembo Aying, Chief of Police (COP) sa Mati City PNP, gibutyag niini nga mi-surrender ug nangadakpan ang mga miyembro sa Pinatikan Religious Group human sa gihimong hot pursuit operation.
Matud ni Aying nga sa pito (7) ka na-rescue, lima niini ang mitahan sa kapulisan ug nadakpan ang duha (2).
Samtang, ni-surrender ug nadakpan usab ang anaa sa dili muobos 20 ka indibidwal nga miatake sa prisohan.
“Pito man ‘to sila ang gi-rescue. Ang lima ni-surrender na, so duha nalang ang nabilin. Kadtong duha karon, gahapon sa hapon (Agosto 23, 2021) pa man namo nakuha gikan sa Tarragona, karon pa ‘to i-inquest. Ang kadtong naga-rescue, ni-surrender na ‘to tanan, ang uban nadakpan namo. Na-file’an napud sila’g kaso,” butyag ni Aying.
Kasong Obstruction of Justice, Destruction of Government Property ug Delivery of Personnel from Jail ang atubangon sa mga nag-rescue. Samtang, additional nga kaso labot sa Evasion of Service of Sentence ang atubangon sa mga na-rescue nga indibidwal.
Padayon gihapon ang pagpalawom sa imbestigasyon diin gitan-aw usab karon sa otoridad ang posibilidad nga ‘inside job’ ang insidente.
RadyoMaN Kirby Manzon
