Davao City – Anaa na sa ‘recovering stage’ ang 21 anyos nga babae nga nagpositibo sa Coronavirus Disease 2019 (COVID-19) nga naggikan sa Pantukan, Davao de Oro ug maoy unang kaso nga natala sa Davao region.
Sa interbyu sa DXDC RMN Davao kang Mes Catherine Pangay, Sangguniang Bayan (SB) member sa Pantukan, Davao de Oro, gibutyag niini nga nahinabi niini ang kabanay sa biktima ug nasayrang ‘recovering’ na ang kahimtang niini sa maong balatian nga kasamtangang naka-confine karon sa Davao Regional Medical Center (DRMC) sa Tagum City, Davao del Norte.
“Naka istorya man nako ang isa ka relative nila. Ang istorya sa akoa, recovering stage na gyud siya. Actually wala na daw siya gina-dextrose and pa-recover na gyud ang UTI niya. Mao tong no need to worry na,” saysay ni Pangay.
Nasayran nga mihatud og panic ang insidente sa taga Pantukan apan napasabot ra usab kanila nga dili angay mahadlok ug sundon lamang ang protocol ug measures nga gipatuman sa Local Government Unit (LGU).
RadyoMaN Kirby Manzon
