Davao City – Gikatakdang karong adlawa mag apod-apod og mga rasyon ang Brgy. Dacudao, Calinan alang sa 1st round sa rasyon, ayuda gikan sa lokal nga gobyerno tungod sa COVID-19 crisis.
Sa pakighinabi sa DXDC RMN Davao kang Kapitan Cesario Darunday, Brgy. Kapitan sa Dacudao, Calinan, gitubag niini ang reklamo sa usa ka residente sa ilang barangay nga mag 2nd round nalang sa rasyon, wala pa gihapoy nadawat nga rasyon ang iyang constituents.
“Ang brgy. naghatag atong Sabado, gipalit mismo sa brgy. gikan sa Quick Response Fund. Ang food packs sa City niadto pang Miyekrules gi-deliver. Gahapon gina-finalize pa ang ration card ug masterlist ug kung mahan-ay na, ang purok leader na ang muhatod sa ilang ginsakpan. Lauman nga masugdan karong adlawa (April 17, 2020) ug humanon sa Sabado, ugma,” segun ni Kapitan Darunday.
Subay niini, nangayo og dispensa ang kapitan sa iyang ginsakpan bahin sa nahisgutan ug gipanganti nga atimanon ang mga mulo bahin niini ug mahatagan na og rasyon ang nasakop sa iyang barangay.
RadyoMaN Renz Barbarona
