Davao City – Napasagdan nga niluto ang gituohang hinungdan atol sa nahitabong sunog sa San Miguel Village Matina Aplaya gahapong adlawa nga miresulta sa 2.6 milyon nga damyos.
Sumala sa spot report sa Bureau of Fire Protection nagsumikad ang sunog gikan sa panimalay ni Benjamin Leung, 64 anyos sa dihang nagluto kini bandang alas 1:40 sa kahaponon.
Posibleng sa katigulangon niini iyang nalimtan nga aduna pay baga ang iyang gilutoan ug mikanit kini sa mga light materials hinungdan nga miulbo ug midako ang maong kalayo.
Nasayran nga nasunog ang pipila ka mga behikulo sulod sa bodega nga gipanagiyahan ni Leung ug nasunog usab ang usa ka tindahan ug duha ka residential house nga gipanag iyahan ni Roselyn Balili.
Aduna usab nangapaso ug naka angkon og 3rd degree burn sa tangkogo nga bahin nga mao si Irene Leung samtang naka angkon og 1st degree burn sa tuong bahin sa bukton ang usa ka 14 anyos nga si alyas Anik.
Samtang padayong ginasuta Sa City Social Services Development Office kun CSSDO kung pila kabuok ang mga balay ang nangasunog ug mahatagan og assistance gikan sa lokal nga panggamhanan.
RadyoMaN Paul Canono
