Davao City – ‘Dead on arrival’ sa hospital ang duha ka mga batan-on nga nagmotor sa bangga tali sa dropside truck, sa National Highway, Barangay Astorga Sta. Cruz, Davao del Sur, alas 2:00 sa hapon kagahapong adlawa (Marso 19, 2021).
Sa interbyu sa DXDC RMN Davao kang Police Major Crisaldo Gaila, Chief-of-Police (COP) sa Sta. Cruz PNP, giila niini ang mga biktima nga sila Marc Vincent Naquila, 21-anyos, ug back rider niini nga si Vince Tema, 17-anyos, susamang residente sa Fatima Inawayan, Santa Cruz, Davao del Sur.
Sa inisyal nga imbestigasyon, nasayrang naglawig ang duha ka mga sakyanan sa managlahing direksyon ug pag-abot sa maong lugar, kalit na lamang nag-malfunction ang brake sa truck ug nawad-an og kontrol ang driver niini nga si Jarwin Freires, 39-anyos, residente sa NHA Bangkal, Davao City, hinungdan nga mipadulong kini sa pikas lane ug nibangga sa kasugat nga motorsiklo.
“Ang break sa truck nag malfuction tapos maoy hinungdan nga wala na makontrol sa driver ang iyang sakyanan, nag swerve in the opposite lane hinungdan head on collision siya sa iyang kasugat nga motor,” saysay ni Gaila.
Nakahiagom og injuries sa kalawasan ang duha ka batan-on ug nadala pa sa MARPE Hospital, sa Sta. Cruz apan gideklarang dead on arrival sa attending physician. Detinado karon sa Sta. Cruz Municipal Police Station, ang driver sa truck.
RadyoMaN Kirby Manzon
