Dipolog City – PATAY sa hit and run ang usa ka lalaki angkas sa single motor, nahitabo sa miaging gabii sa may national highway bypass road Brgy. Galas, dakbayan sa Dipolog.
Ang biktima nakabsan sa kinabuhi naila nga si Joben Palacio, 40 anyos, wa maminyo taga Brgy. Singatong lungsod sa Katipunan, Zambo. Norte, kinsa angkas sa iyang silingan nga si Ian Mark Radion, 23 anyos, ulitawo driver sa Honda xrm kolor blue with gray combination.
Sa pag-imbestigar sa Dipolog City Traffic Division, pasado alas 10:00 sa kagabhion nagbiyahe paingon sa sidlakan bahin ang duruha.
Dihang naabot sila sa ngit ngit sa bypass road, didto na gibanggaan sila sa nagsunod nga giingong usa ka honda “civic” kolor puti nga diretso ra usab nipabulhot og wala sila hunungi.
Ang duruha nangalamba sa karsada, gidala sa recue 117 personnel sa Zamboanga del Norte Medical Center, kon diin sila na-admit.
Si Dr. Mark Anthony Mariñas ang niatiman nga doctor, nibutyag ang angkas lango sa ilimnong makahubog ug tungod kay maoy nagrabehan sa iyang mga samad, pasado alas 9:00 kagahapon sa buntag wala na kini masalbar, nakabsan sa iyang kinabuhi gumikan sa naakong Cardio Pulmonary arrest secondary to traumatic injury.
Padayon ang imbestigasyon sa kapolisan ning dakbayan kabahin sa maong hitabo aron mailhan ang nagmaneho sa sakyanan nga natangtangan pa og usa ka side mirror dihang nakapongit.
Nangayo og tabang karon ang pamilya sa biktima, hilabi na sa mga residente duol sa crime scene aron masuta ang impormasyon sa sakyanan nga nibangga sa kanila.
