Davao City – Magatubang og kasong may paglapas sa Wildlife Resources Conservation and Protection Act kun RA 9147 ang duha ka mga lalaking giingong mga caretakers sa nagkantidad nga P250,000 nga mga smuggled exotic animals nga gikan og Indonesia nga gitaguan sa may Brgy. Dahican, Mati City, Davao Oriental.
Sa interbyu sa RMN Davao kang Police Lt. Col . Adolfo Eyan ang Chief Of Police sa Mati City PNP nga ipasang-at nila ang kaso ugmang adlawa sa prosekyutor batok sa duha ka mga dinakpan nga sila Jomar Toledo, 34 anyos ug Rompas Lumakore, 25 anyos parehong mga taga-Brgy. Calumpang, General Santos City.
Na-rescue atol sa hiniusang pwersa sa National Bureau of Investigation, Department of Environment and Natural Resources, 28th Infantry Batallion Philippine Army ug kapulisan sa Mati ang anaa sa 400 ka mga exotic animals lakip niini mga black palm cockatoos, wallabies, ug mga Indonesian birds nga matud pa gikan og Papua New Guinea.
Matud ni Eyan nga dili pa lamang dugay ang maong mga hayop sa maong lugar kinsa gituohang ginabaligya usab sa online.
Gibutyag ni Department of Environment and Natural Resources (DENR) Senior ecosystems management specialist Dr. Rogelio Demelletes Jr. nga giaksyunan nila ang sumbong nga ang Mati ang usa sa mga ginahagbungan sa mga gina-smuggled nga mga hayop nga gikan og Indonesia.
Ang Biodiversity Management Bureau kun BMB, DENR Regional Office ug Mati DENR Provincial Office maoy nangunay sa pag-ila ug pag-ihap sa mga na-rescue nga mga wildlife species.
Kasamtangang nakakustodiya ang mga nagkadaiyang klase sa hayop sa CENRO Mati.
RadyoMaN Aimee Guinita
