Davao City – Natapos nga duguon ang operasyon sa kapulisan niadtong Pebrero 14 batok sa gikonsiderang #2 Drug personality sa Sto. Tomas ug gitudlong usa sa mga sources sa droga didto sa may Purok 1-A, Sitio Apitong, Brgy La Libertad, Sto.Tomas, Davao Del Norte.
Ang target sa entrapment operation nga si Hanico Abella Halili, 42 anyos napusilan patay sa mga awtoridad human giingong nibunlot kini’g Granada sa iyahang sling bag.
Matud pa sa report sa kapulisan namatikdan niini nga mga awtoridad ang iyahang ka-transact.
Nasakmit sa posisyon sa suspek ang 3 ka mga dagkong pakete sa shabu, granada, P18,000 nga buy-bust money ug mga drug paraphernalia.
Gidala sa Cofreros Funeral Parlor sa may Brgy Tibal-og, Sto.Tomas, Davao Del Norte ang patayng lawas sa biktima.
Sa pikas bahin malampusong naaresto sa Digos PNP uban ang PDEA XI atol sa joint Anti-Illegal Drug Buy-bust Operation ubos sa Project Double Barrel Reloaded ang 40 anyos nga kanhi drug surrenderee ug nahilakip sa PDEA watchlist nga suspek nga si Ariel Regidor Cirilo alyas “Aying”.
Gikasa ang operasyon didto sa Sangguniang Panlungsod (SP) building at Jose Abad Santos St., Brgy. Zone 3, Digos City diin napalitan ang suspek sa asset sa mga operatiba og shabu.
Matud ni Police Regional Office XI Regional Director PCSupt. Marcelo Morales ngadto sa padayon gihapong nalambigit sa iligal nga mga aktibidad nga magsilbi kining pasidaan ngadto kanila.
Gipaniguro ni Morales isip labaw sa kapulisan sa Davao Region nga magpabiling ubos ang ihap sa krimen ug mamentenar ang kahusay ug kalinaw.
RadyoMaN Aimee Guinita
