2 illegal loggers sa Mati, arestado

Davao City – Paglapas sa Presidential Decree (PD), 705 ang atubangon sa duha ka mga lalaki nga nadakpan tungod sa iligal nga pagpamutol og kahoy sa Makar, Sitio Supsopon, Barangay Macambol, Mati City, Davao Oriental niadtong Pebrero 20, 2023.

Sa interbyu sa DXDC RMN Davao kang Non-Uniformed Personnel (NUP) Erwin Rosal sa Mati City Police Station, giila niini ang mga dinakpan nga sila Ramel Escobella, 31 anyos ug Jannel Bebero, 34 anyos, pulos laborer ug residente sa Sitio Wagon, Barangay Macambol, Mati City.

Nakumpiska sa nahisgutan ang upat ka mga Lauan forest products nga adunay estimated 100 board feet ug mukantidad og P4,000.

Pahimangno sa kapulisan nga sa katawhan nga likayan ang iligal nga pagpamutol og kahoy ilabi na nga kini muhatod og kadaot sa kinaiyahan nga muresulta sa kalamidad.

“Iwasan lang gyud nila’ng pagpamutol sa mga bukid-bukid. Parehas ani ‘ron nga sige’g ulan. Grabe’g landslide. Grabe’g baha. Mao nang undangon na nila na ilang illegal (logging),” pahimangno sa police personnel.

RadyoMaN Kirby Manzon