Sa pakighinabi sa DXDC RMN Davao kang Police Corporal Dennis Retiza, imbestigador sa Compostela MPS, iyang gibutyag nga pinaagi sa ilang pakig-alayon sa kapulisan sa Davao, nakit-an ang duha ka senior high school students nga nangaon sa Roxas Night Market alas 4:00 sa hapon niadtong Biyernes, September 15, 2023 ug didto sila nailhan sa kapulisan ug napapauli alas 9:00 sa gabii sa maong adlaw.
“Nagpatabang mi sa Davao (PNP). Didto sila na-hold sa tropa sa Roxas Night Market kay gi-sendan man namo sila’g picture. Unya nanawag sa pamilya, unya naay ig-agaw nga nakaadto. Mao toy nagdala diri padulong sa Compostela,” saysay sa imbestigador.
Samtang gihangyo usab ni Compostela Mayor Levi Ebdao nga likayan ang pag-bash sa duha ka estudyante ug sabton ang ilang mga giagian. Gipasalamatan usab sa alkalde ang netizens, mga indibidwal ilabi na ang kapulisan nga mitabang aron nga makauli nga luwas ang duha ka estudyante.
“Akong hangyo lang na ato silang i-welcome og balik na malipayon sa atong community. Di pud lalim ilang giagian, ug I hope na malipayon ilang maagian sa ilang pag uli. Undangon nato ang unecessary comments and bashing. Kay lahi lahi ta’g mga experience sa kinabuhi,” Facebook post ni Ebdao.
RadyoMaN Kirby Manzon
