2 ka estudyanteng nag-motor mibangga sa bus, usa patay

Davao City – Dead on arrival ang usa ka estudyante samtang angol ang angkas niini human nabangga ang ilang gisakyang motor sa usa ka bus sa Purok 2-A, Poblacion, Laak, Davao de Oro kagahapong adlawa, November 30, 2023.

Sa interview sa DXDC RMN Davao kang PSSg. Marcelino Simbajon, imbestigador sa Laak Municipal Police Station (MPS), iyang gibutyag nga ang mga nag-motor mag-schoolmate (Grade 10 ug 11) pulos 15 anyos ug nagpuyo sa Laak, Davao de Oro.

Samtang ang driver sa bus nga mao si Elyboy Tamayo, 40 anyos, taga Poblacion, Laak sa susamang probinsya.

Gisaysay sa imbestigador nga gikan eskwelahan ang mga estudyante ug pag-abot sa kurbada nga bahin mikawat sa pikas lane ang motor rason nga nabanggaan nila ang bus nga ilang gikasugat.

“Kusog-kusog gyud ni (ilang dagan) unya wala na nila nakontrol siguro tapos timing nga approaching ang Davao Metro Shuttle (bus). Maoy niresulta sa ilang head-on collision,” saysay ni Simbajon.

Sa pagkakaron, gikustodiya na sa Laak MPS ang driver sa bus ug andam usab ang kumpanya nga abagahon ang galastohon ilabi na ang pagpahilona sa mipanaw nga biktima.

Pahimangno sa otoridad sa mga motorista nga mag-amping sa pagbiyahe ug siguradohong adunay protective/safety gears, diin nasayrang walay helmet ang duha ka estudyante atol sa insidente.

RadyoMaN Kirby Manzon