2 ka lalaki mipalusot og 35 drums sa diesel fuel, arestado

Davao City – Detenado na sa Sta. Cruz Municipal Police Station (MPS), ang duha (2) ka indibidwal nga misulay og palusot og diesel fuel, human naaresto sa kapulisan uban ang Criminal Investigation and Detection Group (CIDG), Davao Sur Provincial Forensic Unit (DSPFU), ug 1104th Revitalized-Pulis sa Barangay (RPSB)-XI.

Sa interbyu sa DXDC RMN Davao kang Police Lieutenant Colonel Kristopher Sabsal, Acting Chief of Police sa Sta. Cruz MPS, giila niini ang mga dinakpan nga sila si General Carlos Ambay, 51 anyos, truck driver, residente sa Dalapitan, Matalam, North Cotabato, ug si Arwee Dandal, 22 anyos, ulitawo, truck helper ug residente sa Purok 1, Dalipe, Mlang, North Cotabato.

Nakumpiska sa awtoridad sulod sa ilang gisakyang wing van truck ang 35 ka drums nga adunay sulod nga 200 liters sa diesel nga mukantidad og P10,500 matag usa o musumada og P367,500 ug kini wala nagbaton og igong dokumento.

“Na-file’an namo na’g kaso. Naka-detain na sila sa police station nato,” segun ni Sabsal.

Pahimangno sa kapulisan nga publiko nga siguraduhong muagi sa legal nga proseso ug saktong dokumento ang himuong mga transaksyon.

RadyoMaN Kirby Manzon