Davao City – Gikustodiya na sa Nabunturan Municipal Police Station (MPS) ug mag-atubang og tukmang kaso ang duha ka mga lalaki nga nadakpan human nga nagbahis-bahis ug nagdala og hinagiban alas 4:00 sa kaadlawon, Marso 12, 2024.
Sa interview sa DXDC RMN Davao kang PSSg. Marlon Torrefranca, imbestigador sa Nabunturan MPS, iyahang gisaysay nga sa pagronda sa barangay functionaries ug tanod, duha ka mga kadudahang lalaki ang ilahang nakit-an sa Barangay Sto. Niño nga nagdala kini’g hinagiban o kutsilyo ug .38 revolver.
Nasayrang ang duha nagsakay sa usa ka motor nga kolor itom ug walay plate number, rason nga gilayong kining gi-hold sa otoridad.
“Nadakpan sila sa pagronda sa mga tanod. Kumbaga ang salaod nga nabuhat nila kadtong nagdala-dala sila’g baril ug kutsilyo,” sulti ni Torrefranca.
Giawhag usab sa Nabunturan MPS ang publiko nga muduol sa ilang presinto kung sila posibleng nabiktima sa sa duha ka mga dinakpan.
RadyoMaN Kirby Manzon
Facebook Comments
