Sindangan, Zamboanga del Norte – Nakabsan sa kinabuhi ang usa ka lineman sa electric coop samtang ang kauban giobserbahan pa ang kahimtang sa tambalanan human makuryentehan sa gipahigayong clering operation sa ilang distribution line.
Si Engr. Joseph Villarias Bermudez, ang chief operation and maintenance division sa Zamboanga del Norte Electric Cooperative Inc. kon (ZANECO) nagpagtala sa Sindangan Municipal Police Station sa gidangatan sa duha ka lineman nga sila *Christopher Fernandez Barazon*, 28 anyos, minyo ug lumulupyo sa barangay Labakid, lungsod sa Sindangan, *Jose Riel Miñao De Felix*, 38 anyos, minyo, nga taga barangay poblacion, lungsod sa Leon B. Postigo, ZDN.
Nasayran nga nahitabo ang insidente pasado alas-10:00 sa buntag sa Sitio Horseshoe, Barangay Pangalalan sakop sa lungsod sa Sindangan.
Sumala pa sa engineer, mga alas 8:55 sa buntag giputlan na nila ug koneksyon sa kurente ang primary line (C7-C7) hinungdan kompiyansa ang duha ka lineman sa pagkurikuri niini apan kalit matud pa nanguryente ang live wire.
Polos gipangdala ang duha ka mga biktima sa Sindangan District Hospital kun diin idineklarang dead on arrival si Jose Riel Miñao De Felix.
Gibalhin usab gilayon sa Zamboanga del Norte Medical Center sa dakbayan sa dipolog ang kauban nga si Christopher Fernandez Barazon ug giobserbahan pa ang kahimtang sa nagatiman na doktor.
Photo Courtesy: Zaneco
